నటుడు ఆదిత్య రాయ్ కపూర్ ఇంట్లో చొరబడిన దుబాయ్ మహిళ

బాలీవుడ్ నటుడు ఆదిత్య రాయ్ కపూర్ ఇంట్లోకి అనుమతి లేకుండా ప్రవేశించినందుకు గాను దుబాయ్‌కు చెందిన ఒక మహిళను ముంబై పోలీసులు అరెస్ట్ చేశారు. ఆదిత్య రాయ్‌తో తనకు మీటింగ్ ఉందని నమ్మించి ఆమె సోమవారం సాయంత్రం బాంద్రాలోని ఆయన నివాసంలోకి ప్రవేశించినట్లు తెలిసింది.

వివరాల్లోకి వెళితే, 39 ఏళ్ల ఆదిత్య రాయ్ కపూర్‌కు దుస్తులు, బహుమతులు ఇవ్వాలని చెప్పి సదరు మహిళ సోమవారం సాయంత్రం ఆయన ఇంటికి వచ్చింది. నటుడితో తనకు ముందుగా మీటింగ్ ఉందని చెప్పడంతో, ఇంట్లో పనిచేసే సహాయకురాలు ఆమెను లోపలికి అనుమతించారు. అయితే, ఆదిత్య రాయ్ కపూర్ ఇంటికి వచ్చిన తర్వాత, ఆ మహిళ వచ్చిన విషయాన్ని సిబ్బంది తెలియజేశారు. అయితే ఆమె ఎవరో తనకు తెలియదని కపూర్ స్పష్టం చేశారు. దీంతో అప్రమత్తమైన ఇంటి సిబ్బంది, ఆమె నటుడి వద్దకు వెళ్లేందుకు ప్రయత్నించగా అడ్డుకున్నారు.

వెంటనే వారు పోలీసులకు సమాచారం అందించారు. పోలీసులు ఘటనా స్థలానికి చేరుకుని మహిళను అదుపులోకి తీసుకున్నారు. ఆమెను విచారిస్తున్నట్లు తెలిసింది.

ఇటీవల కాలంలో ప్రముఖ నటుల ఇళ్లలోకి అక్రమంగా ప్రవేశించేందుకు యత్నించిన ఘటనలు ముంబైలో కలకలం రేపుతున్నాయి. కొద్ది రోజుల క్రితమే, మే 20 మరియు మే 21 తేదీల్లో నటుడు సల్మాన్ ఖాన్ నివాసంలోకి ప్రవేశించడానికి ప్రయత్నించిన ఒక వ్యక్తిని, ఒక మహిళను ముంబై పోలీసులు అరెస్ట్ చేసిన విషయం తెలిసిందే. నిందితులను ఛత్తీస్‌గఢ్‌కు చెందిన జితేంద్ర కుమార్ సింగ్ (23), ఇషా ఛబ్రా (32)గా గుర్తించారు.